Eriketa Qorlazja mësuese e mësimit plotësues të gjuhës shqipe  në Athinë të Greqisë,

Jam Eriketa Qorlazja,  mësuese e mësimit plotësues të gjuhës shqipe  në Athinë të Greqisë, që nga viti 2014 dhe zv/ kryetare e  Lidhjes së Mësuesve Shqiptarë në Greqi.

Gjuha shqipe është gjuha e mëmës, është dashuria jonë për të dhe e saj për ne. Është gjithçka që personifikon ekzistencën tonë si komb nga e shkuara në ditët e sotme e deri në pafundësi, ajo na jep emrin shqiptar e kjo nuk ndryshon kudo ku jemi.

Duke jetuar në emigracion, ne mësuesit  kuptuam që herët sesa  e rëndësishme është të flasësh e të mbash gjallë gjuhën amtare dhe  rrezikun e asimilimit të saj tek fëmijët

 Por të mos harrojmë se prindërit e fëmijëve janë një element i rëndësishëm në trekëndëshin mësues prindër nxënës

Prindër të dashur, mbështetja juaj  është sa e domosdoshme aq  dhe shumë e vyer

Prandaj, vazhdoni të na mbështetni në misionin tonë të shenjtë e të përbashkët.

Duke sjellë fëmijët në shkollat shqipe ju dhe ne  kemi përmbushur detyrën morale dhe kombëtare që  ti japim kësaj gjuhe të bekuar  respektin e duhur në vendin ku jetojmë, që ajo të vazhdojë të ekzistojë e flitet e bukur dhe e pastër siç na e lanë amanet rilindësit tanë.